Jólatónleikar Mótettukórsins hafa í áratugi verið ómissandi jólahefð á aðventunni í Reykjavík. Á efnisskránni í ár eru uppáhalds jólalög kórsins frá ýmsum tímum, m.a. Nóttin var sú ágæt ein, Slá þú hjartans hörpustrengi eftir J.S. Bach auk tveggja fallegra útsetninga af Það aldin út er sprungið.

Hrafnhildur Marta Guðmundsdóttir mun leika undir á selló í nokkrum lögum. Hrafnhildur Marta hefur leikið með hljómsveitum beggja vegna Atlantshafsins og leikið einleik með Sinfóníuhljómsveit Íslands og Sinfóníuhljómsveit Norðurlands. Hún hefur gegnt stöðu leiðara sellódeildar Sinfóníuhljómsveitar Norðurlands auk þess að hafa verið fyrsta selló í hljómsveitum á borð við Aurora Symphony Orchestra í Stokkhólmi og Aspen Opera Orchestra í Colorado, Bandaríkjunum.

Einsöngvarar úr röðum kórsins munu syngja í yndislegum jólaaríum og barnakór Mótettukórsins, sem er skipaður börnum kórfélaga, mun taka undir í völdum lögum. Við lofum einstakri jólastemningu við Reykjavíkurtjörn þann 12. og 13. desember nk. og hlökkum til að eiga með ykkur yndislega hátíðarstund í Fríkirkjunni.

Mótettukórinn hefur lengi verið meðal fremstu kóra á Íslandi  og hlaut Íslensku tónlistarverðlaunin sem „Tónlistarflytjandi ársins“ í „Sígildri og  samtímatónlist – hópar“ árið 2021. Kórinn hefur áður verið tilnefndur nokkrum sinnum til verðlaunanna.  Verkefnalisti kórsins er langur og fjölskrúðugur. Þar má finna fjölmargar óratóríur, passíur og  sálumessur en líka kórverk án undirleiks frá ýmsum tímum, auk þess sem kórinn hefur  frumflutt fjölda íslenskra tónverka og unnið til verðlauna í alþjóðlegum kórakeppnum. 

Flytjendur:

Mótettukórinn

Hrafnhildur Marta Guðmundsdóttir, selló

Einsöngvarar úr Mótettukórnum

Barnakór Mótettukórsins

Stjórnandi: Bjarni Frímann Bjarnason