Listvinafélag Hallgrímskirkju stendur fyrir hádegistónleikum með íslenskum organistum alla fimmtudaga í sumar frá 25. júní – 20. ágúst kl. 12.30 undir heitinu ORGELSUMAR Í HALLGRÍMSKIRKJU 2020, en vegna heimsfaraldursins varð að fresta Alþjóðlegu Orgelsumri 2020 í Hallgrímskirkju.

Íslenskir organistar munu sjá til þess að Klais-orgel Hallgrímskirkju þagni þó ekki og á tónleikum sumarsins gefst áheyrendum kostur á að heyra 9 íslenska organista, sem starfa við kirkjur víða um land, leika listir sínar í Hallgrímskirkju.

Á tónleikunum má heyra mjög fjölbreyttar og aðgengilegar efnisskrár með orgelverkum m.a. eftir J.S. Bach (Tokkata og fúga í d-moll, Passacaglia), Albinoni (Adagio), Mendelssohn, Mozart, Widor (Tokkata), Vierne og Alain ( Litanies).

Listrænn stjórnandi og ábyrgðarmaður ORGELSUMARS 2020 er Hörður Áskelsson kantor Hallgrímskirkju,

Aðgangseyrir er 1500 krónur fyrir fullorðna, ókeypis fyrir félaga í Listvinafélaginu og börn yngri en 16 ára.
Miðasala er við innganginn.

Dagskrá hefst kl. 12.30:

06. ágúst – Eyþór Ingi Jónsson, Akureyrarkirkju

Ath. Stutt helgistund er í kirkjunni kl. 12 í umsjá presta Hallgrímskirkju og eru allir hjartanlega velkomnir.