Lokatónleikar Listvinafélagsins – einstakur viðburður – Jólaóratórían í Hörpu

Mótettukórinn, Schola Cantorum, Alþjóðlega barokksveitin í Reykjavík ásamt einsöngvurum flytja Jólaóratóríuna BWV 248 eftir Johann Sebastian Bach í Eldborg Hörpu sunnudaginn 29. desember kl. 17.

Þessir glæsilegu hátíðartónleikar verða lokatónleikar á 42 ára starfsferli Listvinafélagsins í Reykjavík, áður Listvinafélags Hallgrímskirkju, og lýkur þannig einstökum kafla í menningarsögu þjóðarinnar.

Jólaóratóría Bachs er án efa frægasta tónverk jólanna og er flutt um allan heim á aðventu og jólum. Verkið segir söguna af fæðingu Jesú á einstaklega áhrifamikinn og hrífandi hátt. Mótettukórinn og kammerkórinn Schola Cantorum syngja Jólaóratóríuna í fyrsta sinn saman en Mótettukórinn flutti verkið seinast árið 2021 í Hörpu undir stjórn Harðar Áskelssonar við mikla hrifningu áheyrenda og hlaut Íslensku tónlistarverðlaunin sem tónlistarflytjandi ársins 2021 fyrir flutninginn.

Tuomo Suni

Báðir kórarnir voru stofnaðir af Herði Áskelssyni og voru burðarstoðir í rómuðu starfi hans sem kantor í Hallgrímskirkju um áratuga skeið. Kórarnir eru í fremstu röð íslenskra kóra og hafa hlotið mörg verðlaun í alþjóðlegum keppnum. Alþjóðlega barokksveitin í Reykjavík flytur nú Jólaóratóríuna í 6. sinn á vegum Listvinafélagsins, en barokksveitin, sem skipuð er afburða hjóðfæraleikurum bæði frá Íslandi og víða að úr heiminum, hefur ávallt fengið mikið lof fyrir leik sinn og margir meðlima hennar starfa með frægustu barokksveitum heims. Konsertmeistari er hinn frábæri finnski fiðluleikari Tuomo Suni sem leitt hefur barokksveitina á tónleikum hennar undir stjórn Harðar Áskelssonar undanfarin ár af einstakri fagmennsku.

Einsöngvarar á tónleikunum eru allir í fremstu röð:

Alex Potter

Alex Potter kontratenór frá Englandi sem fer með eitt stærsta einsöngshlutverkið í Jólaóratóríunni er einn af fremstu kontratenórum heims og afar virtur túlkandi barokktónlistar. Hann kemur nú fram í fjórða sinn á vegum Listvinafélagsins og er koma hans fagnaðarefni fyrir fjölmarga aðdáendur hans hér á landi.

Herdís Anna Jónasdóttir

Herdís Anna Jónasdóttir sópran var valin söngvari ársins á Íslensku tónlistarverðlaununum 2022 og hlaut Grímuna árið 2019 auk ýmissa annarra verðlauna og viðurkenninga. Hún hefur margoft komið fram í stórum einsöngshlutverkum frá ýmsum stíltímabilum bæði í óperum og óratóríum og hlotið mikið lof fyrir.

Jóhann Kristinsson

Jóhann Kristinsson baríton hefur vakið mikla athygli og unnið til margra verðlauna og var valinn söngvari ársins á Íslensku tónlistarverðlaununum 2024. Hann hefur unnið með stjórnendum á borð við Herbert Blomstedt, Bertrand de Billy og Kent Nagano og komið fram með fjölmörgum virtum hljómsveitum. Hann söng í fyrsta sinn sem einsöngvari með Mótettukórnum í Messíasi eftir Händel í desember 2019 og tók einnig þátt í hinum rómaða flutningi Mótettukórsins og Alþjóðlegu barokksveitarinnar á Jólaóratóríunni í Hörpu 2021.

Benedikt Kristjánsson

Benedikt Kristjánsson tenór syngur hlutverk guðspjallamannsins og einsöngsaríur ásamt því að stjórna flutningi á tónleikunum. Benedikt er einn af eftirsóttustu ungu tenórum heims um þessar mundir og má segja að hann hafi hlotið heimsfrægð eftir að hann var fenginn til að flytja Jóhannesarpassíu Bachs í útsetningu fyrir þrjá flytjendur í beinni útsendingu frá Tómasarkirkjunni í Leipzig á föstudaginn langa 2020 en skömmu áður höfðu þremenningarnir flutt verkið í sama búningi í Hallgrímskirkju á vegum Listvinafélagsins.

Sem guðspjallamaður í passíum Bachs og Jólaóratóríu og einsöngvari í öðrum óratóríum hefur Benedikt komið fram víða um heim og sungið með þekktum hljómsveitum í mörgum af stærstu tónleikahúsum heims. Hann hefur unnið með mörgum virtum stjórnendum og má þar nefna Reinhard Goebel, Hans-Christoph Rademann og Philippe Herreweghe. Benedikt hefur undanfarin ár margoft komið fram undir stjórn Harðar Áskelssonar með kórum hans og er gleðilegt að hann sem hóf feril sinn sem guðspjallamaður undir stjórn Harðar árið 2011 stjórni þessum tímamótatónleikum, en hann hefur einnig æft báða kórana fyrir þennan flutning.

Með flutningi Jólaóratóríunnar gefur Listvinafélagið íslenskum tónleikagestum kost á að upplifa eitt af stórvirkjum tónbókmenntanna í flutningi einvalaliðs hljóðfæraleikara sem hafa sérhæft sig í barokkflutningi og framúrskarandi einsöngvara og kóra. Fluttar verða kantötur I–III og V og tekur hver kantata u.þ.b. 30 mínútur í flutningi.

Tónleikarnir eru um 2 og 1/2 klst með hléi. Flytjendur eru alls hátt í 100 – 60-70 manna kór, 27 hljóðfæraleikarar, 4 einsöngvarar og stjórnandi.

Miðasala á þennan einstaka menningarviðburð er á tix.is

Flytjendur:

Herdís Anna Jónasdóttir sópran
Alex Potter kontratenór
Benedikt Kristjánsson tenór
Jóhann Kristinsson bassi

Mótettukórinn
Schola Cantorum
Alþjóðlega barokksveitin í Reykjavík
Konsertmeistari: Tuomo Suni

Stjórnandi: Benedikt Kristjánsson

 Skoða Jólaóratorían plakat hér.