Myndlistin

Listvinafélag Hallgrímskirkju hefur haft aðstöðu til sýninga í  forkirkju Hallgrímskirkju, en nokkrar sýningar hafa teygt sig inn í kirkjurýmið og út á torgið fyrir framan kirkjuna.

Mikill fjöldi íslenskra myndlistarmanna hefur sýnt í Hallgrímskirkju frá stofnun Listvinafélags Hallgrímskirkju haustið 1982 og eru margir af fremstu listamönnum þjóðarinnar meðal þeirra sem hafa sýnt á Kirkjulistahátíð eða á vegum Listvinafélagsins þau 32 ár, sem Listvinafélagið hefur starfað.

Meðal þeirra sem haldið hafa einkasýningar í forkirkju Hallgrímskirkju eru:

Bragi Ásgeirsson, Rúrí, Georg Guðni, Karólína Lárusdóttir, Guðrún Kristjánsdóttir, Ólöf Nordal, Guðjón Ketilsson, Valgarður Gunnarsson, Ragnheiður Jónsdóttir, Baltasar Samper, Sigrún Eldjárn, Jón Reykdal, Kristín Gunnlaugsdóttir, Svava Björnsdóttir, Þorbjörg Höskuldsdóttir, Hörður Ágústsson, Guðjón Ketilsson, Steinunn Þórarinsdóttir, Helgi Þorgils Friðjónsson, Sólveig Baldursdóttir, Sigtryggur Bjarni Baldursson, Magdalena María Kjartansdóttir, Leifur Breiðfjörð, Húbert Nói Jóhannesson, Hulda Stefánsdóttir, Aðalheiður Valgeirsdóttir, Guðbjörg Lind Jónsdóttir, Arngunnur Ýr Gylfadóttir, Harpa Árnadóttir, Hafliði Hallgrímsson, Páll á Húsafelli, Ásgerður Búadóttir, Vignir Jóhannesson, Elín Edda Árnadóttir, Guðrún Gunnarsdóttir, Sigurlaug Jóhannesdóttir, Páll Thayer, Þóra Þórisdóttir, Valgerður Bergsdóttir, Inga Þórey Jóhannsdóttir, Anne Thorseth, Georg Guðni, Hildur Bjarnadóttir, Sigurður Guðjónsson, Rósa Gísladóttir, Erla Þórarinsdóttir, Valgerður Bergsdóttir, Hulda Hákon, Erla S. Haraldsdóttir, Málfríður Aðalsteinsdóttir o.fl.

Fulltrúar myndlistar í stjórn Listvinafélagsins frá stofnun félagsins 1982 hafa verið myndlistarmennirnir/ listfræðingarnir Ólafur Kvaran, Snorri Sveinn Friðriksson, Sigríður Jóhannsdóttir, Jón Reykdal, Þóra Kristjánsdóttir, Elín Edda Árnadóttir, Guðrún Kristjánsdóttir, Ólöf Nordal, Þóra Sigurðardóttir og Rósa Gísladóttir, sem hefur verið í stjórn frá vorinu 2015.

Sýningarröðin KRISTIN MINNI var stofnuð 2010 að frumkvæði Guðrúnar Kristjánsdóttur myndlistarmanns, þáverandi sýningarstjóra Listvinafélagsins. Í þeirri röð er myndlistarmönnum boðið að vinna verk sérstaklega fyrir kirkjuna og að fá guðfræðing og listfræðing  til samráðs og samræðu. Ævar Kjartansson guðfræðingur hefur stýrt umræðunum en aðrir þátttakendur voru Ólafur Gíslason listfræðingur og guðfræðingarnir sr. María Ágústsdóttir ( HS) og dr. Sigurður Árni Þórðarson ( GK, ÓN) . Samtal þeirra var hljóðritað og gátu gestir hlustað á kjarna þeirrar samræðu í heyrnartólum á sýningunni,  til aukins skilnings á merkingu verkanna og tilurð þeirra. Alls hafa 3 sýningar verið haldnar undir merkjum KRISTIN MINNI, sýning Ólafar Nordal LEIÐSLA, sem opnaði í mars á Kirkjulistahátíð 2010 og stóð yfir það sumar, sýning Huldu Stefánsdóttur UPPLAUSN frá ágúst til desember 2010 og sýning Guðrúnar Kristjánsdóttur VATN, sem opnaði á Kirkjulistahátíð 2013 og stóð til loka nóvember 2013. Í upphafi var stefnt að því að hafa 3 sýningar á ári í röðinni KRISTIN MINNI, en af fjárhagsástæðum hafa sýningar orðið færri en áætlað var í upphafi.

KIRKJULISTAHÁTÍÐ – MYNDLIST
Nýsköpun í myndlist skipar ávallt stóran sess á Kirkjulistahátíð.
Á undanförnum hátíðum hafa eftirtaldir myndlistarmenn verið listamenn Kirkjulistahátíðar og hafa þemu tengd yfirskrift hátíðarinnar oftar en ekki orðið þeim innblástur:

2003 Guðjón Ketilsson – listaverk hans  útskorið ský á vegg í miðri forkirkju Hallgrímskirkju. (Yfirskrift hátíðarinnar: “Ég ætla að gefa vatn á jörð”)

2005 Rúrí – “Salt og ljós” – Listaverk byggt á 2 upplýstum stólpum fylltum af salti í forkirkju Hallgrímskirkju var framlag hennar til hátíðarinnar og gjörningur hennar á stórum tjöldum, sem strengd voru þvers yfir kirkjuskipið, þ.s. vídeó af fossum var varpað á tjöldin við orgelspuna Harðar Áskelssonar. Gjörningurinn vakti verðskuldaða athygli og var sýning hennar á Kirkjulistahátíð tilnefnd til myndlistarverðlauna það ár.
(Yfirskrift hátíðarinnar: “ Þér eruð salt jarðar”).

2007 Svava Björnsdóttir – “Jakobsstiginn”, málmlistaverk.  Sýningin var eitt listaverk, stigi sem hringaðist uppí loft og endaði í spegli sem tákn um óendanleika himinsins.
(Yfirskrift hátíðarinnar: “ Ég vil lofsyngja Drottin”).

2010 Ólöf Nordal – Leiðsla.  Fyrsta sýningin í sýningarröðinni KRISTIN MINNI, sem Guðrún Kristjánsdóttir átti frumkvæði að sem sýningarstjóri myndlistar á vegum Listvinafélags Hallgrímskirkju/ Kirkjulistahátíðar. ( Yfirskrift hátíðarinnar: “Frá myrkri til ljóss”).
Í sýningarröðinni Kristin minni í Hallgrímskirkju, er listamönnum boðið að fá guðfræðing og skrifara til samráðs og samræðu. Verkið var unnið í samstarfi við Jón Nordal tónskáld, föður listamannsins, sem samdi nýtt lag fyrir verk Ólafar, við sálm Hallgríms Péturssonar, Gefðu að móðumálið mitt. Sóknarbörn kirkjunnar við Sjafnargötu ljáðu verkinu raddir sínar og ásjónur. Leiðsla var staðsett í fordyri og kirkjuskipi Hallgrímskirkju auk þess að hljóma í klukkum kirkjunnar.

2013 Guðrún Kristjánsdóttir – VATN var þriðja sýningin í sýningarröðinni Kristin minni og er óður til vatnsins í umhverfi okkar og trúarlífi. Sýningin var í forkirkju og kór Hallgrímskirkju og vakti vatnslistaverkið í forkirkjunni m.a. mikla athygli. Hluti verksins var tónlist Daníels Bjarnasonar tónskálds. Sýningarstjóri var Þóra Sigurðardóttir.

 

Listvinafélag Hallgrímskirkju er bakhjarl Kirkjulistahátíðar.